المونديال ع الكنبة – ميسي وإيميليانو يحملان الأرجنتين

Game, set, and match..

وكأنك خارج من ماتش بيتلعب بقاله يومين مثلًا، ١٢٠ دقيقة وضربات جزاء يتقسموا فصول من المتعة وتبادل اللعب اللي كان سجال بين الفريقين، مع أفضلية للأرجنتين في كذا جانب نتج منه سيطرة نتج عنها بالتبعية هدفين.

كنت متوقع عودة هولندا في الدقايق الأخيرة بس مش بالشكل ده، السبب في توقعي هو عدم اتزان ملحوظ في أداء الشباب الأرجنتيني الصغير اللي ارتكب أخطاء جعلت ضغط هولندا يجيب نتيجة، خصوصًا الهجوم الشامل اللي اتعمل من ڨان جال باستغلال أطول اللاعيبة في الخط الأمامي خصوصًا مع نزول ڨيجهورست اللي سجل الهدفين.

الشيء المبهر هو الثبات والجرأة الكبيرة اللي اتلعب بيهم الفاول اللي اتسجل منه هدف التعادل! يعني حتى لو متمرنين عليه كويس لكن قلب ميت من كل اللاعيبة بتنفيذ الفاول كده.

إيميليانو مارتينيز معروف انه مميز في ضربات الترجيح زي ما كلنا تابعنا في كوبا أمريكا الأخيرة، وده كان نقطة قوة لصالح الأرجنتين خصوصًا بعد ما تصدى لأول ضربة وميسي سجل اللي بعدها.

نقطة أخيرة، وجود أجويرو مع المنتخب النهاردة لقطة جميلة ودموعه بعد الفوز مع اللاعيبة لازم تلمسك كـمحب للكورة، وانتماء شعوب أمريكا الجنوبية عمومًا لوطنها قبل أي مجد شخصي ليها شيء يُدرَّس.

#المونديال_ع_الكنبة

#FIFAWorldCup

#NEDARG