المونديال ع الكنبة – أسى يقابله إعجاب.. السامبا تغادر

أظن ان موسم كاس العالم ده والزخم اللي حواليه فرصة كبيرة لهدم النواميس وضحد الآراء اللي بتدي الحق دايمًا للكسبان بصرف النظر عن الأداء، لحد ما شُفنا إنصاف لأصحاب الأداء في النسخة الحالية ربما يغير نظرة الناس عن ان اللي ماسك الكورة لازم دايمًا يفوز حتى ان كانت كرة القدم علم غير ثابت.

خروج مفاجئ للبرازيل أكيد انه صادم ومزعل ناس كتير من محبي السامبا أو المتعاطفين معاهم، لكن ماننكرش ان شريحة عريضة من الجمهور تعاطفت مع كرواتيا بعد شكلها الرائع والمميز اللي قدمته النهاردة.

كرواتيا لعبت الماتش بذكاء كبير وعلى فترات، تنويع في طرق اللعب ما بين الاستحواذ والضغط والدفاع المنظم والنجاح في زيادة عدد اللاعيبة اللي بتقابل لاعيبة البرازيل بحيث تقلل من وضعيات 1vs1، التنويع ده نفسه اللي حافظ على المجهود البدني للاعيبة كرواتيا اللي فرضت الإيقاع اللي عايزاه من الشوط الأول.

ليفاكوفيتش عملاق جديد في حراسة مرمى كرواتيا خلفًا لحارس كبير قدم كاس عالم خرافية في ٢٠١٨ هو سوباسيتش، ١١ تصدي لحارس مرمى دينامو زغرب منهم ٧ من جوه الصندوق في ١٢٠ دقيقة لعب.

في النهاية في اسم اتشطب، حتى لو ولّد أسى وجعل ناس كتير في حالة صدمة، لكن قدامهم في إعجاب بتدرج الأداء الكرواتي في البطولة.

حد من كرواتيا/ الأرجنتين/ هولندا هيكون في لوسيل يوم ١٨ ديسمبر عشان يلعب نهائي كاس العالم قطر ٢٠٢٢.

#المونديال_ع_الكنبة

#FIFAWorldCup

#CROBRA