المونديال ع الكنبة – التطور يحرم المغرب من البرونزية

لو هحب أحط عنوان للماتش ده، بل لحالة المنتخب المغربي آخر ماتشين أكيد هيبقى “التطور” -ومش اللي جه في دماغك الله يكرمك مش ناقصين حوارات –

احنا كـعرب طول عمرنا عندنا مشاكل في كذا جانب في الكورة، جزء مهم منها ما يتعلق بقدراتنا البدنية، الأسود كسّروا تابوهات كتير من أول البطولة وأثبتوا ان أخيرًا منتخب عربي حقق التطور المطلوب في نواحي كتير، لكن لسه ينقصنا الناحية البدنية.

إصابة قلبي الدفاع الأساسيين، ثم النهاردة إصابات عضلية للاتنين الاحتياطيين، ده غير الوضع البدني الصعب لباقي اللاعيبة حتى وإن كان ده طبيعي عند البوينت دي من البطولة، بس تبص على الجانب الآخر لأ لاعيبة كرواتيا واقفة على حيلها أكتر.

مكنش عيب fatal للمنتخب المغربي، لأن الإنجاز بالفعل اتحقق وإن كنا نتمنى ميدالية عربية لأول مرة في التاريخ، لكن بكرة بعد ما الزعل يروح شوية هنرفع العنوان ده “المنتخب المغربي رابعًا للعالم”.. ♥️

نقطة أخيرة فيما يتعلق بـياسين بونو، فـفي الحقيقة I’ve witnessed his baby steps، لذلك المستوى اللي وصل ليه بالنسبة ليا شيء كان متوقع حتى أخطاؤه بتبقى متوقعة عندي، واستكمالًا لقصة التطور فأنا شايف ان ياسين عنده هامش كبير للتطور خصوصًا ان ٣١ سنة على حارس مرمى سن مش كبير اوي ويقدر يكتسب مهارات أكتر خصوصًا انه من نوعية الحراس اللي بتلعب برجلها.

ختامًا آسف اني بقول ان الماتش كان أكبر من الحكم لكن دي كانت الحقيقة، ولا نشير إلى ان سجل المنتخب الكرواتي في كاس العالم مشرف جدًا؛ برونزية في أول مشاركة في ٩٨ ثم فضية في ٢٠١٨، والنهاردة برونزية جديدة.

وبكده يبقى فاضل ماتش واحد على نهاية أجمل كام يوم بييجوا كل ٤ سنين، ومعاه نهاية #المونديال_ع_الكنبة

#FIFAWorldCup

#CROMAR