المونديال ع الكنبة – حل اللغز

أخيرًا لغز المجموعة الأولى اتحل وعرفنا مين الفارسين اللي هيكملوا منها للدور التاني..

طبعًا كما كان متوقعًا هولندا نجحت في تحقيق الفوز بعد التعادل المفاجئ أمام الإكوادور، نقول هارد لاك تاني لمنتخب قطر اللي خيّب آمال الجميع للأسف، لكن معسكر ٣ شهور في ماربيا دون أي احتكاك كبير يُذكر في الوقت اللي باقي المنتخبات بتُعد بشكل أقوى وانت قافل على اللاعيبة في إسبانيا مكنش كفاية يا عم فيليكس سانشيز لأن لاعيبتك لحد آخر دقيقة ليهم في البطولة مدخلوش أجواءها.

السنغال في المباراة اللي طبعًا أُقيمت في نفس التوقيت مقابلتش معاناة في الوصول لمرمى الإكوادور، كانت مشكلتها في اللمسة الأخيرة لكن بالتنظيم الجيد والروح قدر كاليدو كوليبالي يشيل الاسود على كتفه لدور الـ ١٦.

كرة القدم مليئة بالمشاعر، وده يمكن سبب كبير من أسباب حبنا ليها، فـعلى قد ما كتير مننا كان متعاطف مع السنغال وأنا أولهم وفرحنا بفوزهم، على قد ما دموع لاعبي الإكوادور اللي عملت بطولة عظيمة أثرت فينا، منتخب مشرف وشاب وياريت يبنوا على عدم نجاحهم النسخة دي لعل وعسى يكون ليهم حضور قوي في النسخة القادمة، بنفس الطريقة اللي السنغال حققت بيها الإنجاز النهاردة في نسخة ٢٠٢٢ بعد campaign ٢٠١٨ اللي انتهت بفارق إنذار حرمهم من التأهل.

#المونديال_ع_الكنبة

#FIFAWorldCup

#GroupA