Mohamed Magdy Mahdy
في مباراة السهرة، صراع الكثافة والضغط الجنوني خلص بالتعادل!
قد يبدو لناس كتير ان الماتش ممل لأن رتمه مكنش عالي ولأن عصام الشوالي قال كده ومكنش في المود لأن باين في صوته انه تعبان -الله يكون في عونه- لكن في الواقع الماتش كان تكتيكي من طراز عالي.
زي ما كان باين من الشوط الأول، في شارع عمومي كان مفتوح في الجبهة اليمين من ملعب ألمانيا بوجود ثيلو كيرير، بناءًا على ذلك ملعب إسبانيا كله كان مايل على الناحية دي ومحاولات اختراق أكتر من مرة من داني أولمو وفي ضهره جوردي آلبا اللي بيختاروا دايمًا لعب الكورة بالعرض للي هيقابل، وده كان مفتاح الهدف الأول.
معروف ان المنتخبين وحوش ضغط، وهانسي فليك على الناحية التانية كان لازم الضغط بكثافة عددية كبيرة، خماسي بيضغط في التلت الأول من ملعب إسبانيا عشان يخنق مفاتيح الخروج بالكرة، وتوّلد الخطأ اللي بحث عنه فليك وكان سبب في هدف التعادل اللي سجله رأس الحربة الصريح الوحيد في قائمة منتخب ألمانيا نيكلاس فولكورج لاعب بريمن.
تعادل مقنع للطرفين، بيخلّي على الورق حسابات تأهل الفريقين مع بعض للدور التاني كبيرة جدًا، لكننا شُفنا مفاجآت كتير لحد دلوقتي ولسه الأمر مش مضمون في الجولة الأخيرة.
#المونديال_ع_الكنبة
#FIFAWorldCup
#ESPGER
